ސްރީ ލަންކާގެ ކުރުނެގަލާ ޑިސްޓްރިކްޓްގެ ކުލިޔަޕިޓިޔާގައި މި މާރިޗު މަހުގެ 4 ވަނަ ދުވަހު ކުރިއަށްދިޔަ ގިމަހާ ސައުތު އޭޝިއަން ކަރާޓޭ ޗެމްޕިއަންޝިޕް އަދި 41 ވަނަ ކަރާޓޭ ކުމިތޭ ޗެމްޕިއަންޝިޕްގައި ދިވެހި ގައުމަށް 9 ރަން މެޑައްޔާއި 8 ރިހި މެޑައްޔާއި 1 ލޯ މެޑައްޔެއް ހޯދައިދީ ދިވެހި ގައުމަށް ރީތިނަމެއް ހޯދައިދިން އެތްލީޓޫން ރާއްޖެ އަތުވެއްޖެ އެވެ.

މިއީ މިފަދަ ބައިނަލްއަގުވާމީ މުބާރާތެއްގައި ރާއްޖޭގެ ކަރާޓޭ ޓީމެއް ބައިވެރިވި ފުރަތަމަ ފަހަރެވެ. ކަރާޓޭގައި އިންޑިއާ އަދި ލަންކާ އެތްލީޓުން އަތުން ވެސް ދިވެހިޓީމު ވަނީ ކާމިޔާބުކޮށް ރާއްޖެއްޖެއަށް މި މުބާރާތުގެ ދެ ވަނަ ވެސް ހޯދާފަ އެވެ. އެއްވަނަ ސްރީލަންކާއަށް ލިބުނު އިރު ތިން ވަނަ ލިބުނީ އިންޑިއާ އަށެވެ. މި މުބާރާތުގައި ރާއްޖެ ތަމްސީލްކޮށްފައި ވަނީ ޝޮޓޮކަން ކަރާޓޭ އެސޯސިއޭޝަނުންނެވެ.

ރާއްޖޭގެ އެތުލީޓުންގެ ތެރެއިން ރަން މެޑަލް ހޯދާފައި ވަނީ އަލީ ފާރިޝް، އަހްމަދު މަހުދީ، އަހްމަދު ފަޒީލް، އިބްރާހީމް ޒުހައިރު، ޝާހިސް އަހްމަދު ވަހީދު، ހުސައިން ޒާހިރު، މުހައްމަދު ޒިދާން، އަދި އަޝްފާޤް އުޘްމާނެވެ. ރާއްޖޭގެ އަންހެން އެތުލީޓަކު ވެސް ވަނީ މި މުބާރާތުގައި ރަން މެޑަލް ހޯދާފަ އެވެ. ރަންމެޑަލް ހޯދި އަންހެން އެތުލީޓަކީ އައިޝަތު ތާނީ އެވެ.