2016 ސެޕްޓެންބަރު 24 ވަނަ ދުވަހު މޯލްޑިވްސް ސްޕޯޓްސް ކޯޕަރޭޝަން ލިމިޓެޑާއި މިނިސްޓްރީ އޮފް ޔޫތު އެންޑް ސްޕޯޓްސް ގުޅިގެން ޕެރަޑައިސް އައިލެންޑް ރިޒޯޓުގައި ބޭއްވި ކުޅިވަރު އިޖްލާސް 2016 އަކީ ދިވެހިރާއްޖޭގެ ކުޅިވަރުގެ ދާއިރާގައި ޚިދުމަތް ކުރައްވާ އެންމެހައި ބޭފުޅުންނާއި، ކުޅިވަރު އެސޯސިއޭޝަންތަކުގެ ބޭފުޅުންނާއިއެކު ބޭއްވުނު ކާމިޔާބު އިޖްލާސްއެކެވެ. މިއިޖްލާސްގެ މައިގަޑު މަޤްސަދުތަކުގެ ތެރޭގައި ދިވެހިރާއްޖޭގެ ކުޅިވަރު ދާއިރާ ކުރިއެރުވުމަށް ޖުމްލަ ގޮތެއްގައި ދިމާވެފައިވާ ގޮންޖެހުންތަކާއި އެކަންކަމަށް އޮތް ޙައްލުތަކަކީ ކޮބައިކަން ދެނެގަތުމާއި، ފާއިތުވި އަހަރުތަކުގައި ކުޅިވަރު ދާއިރާގައި އުޅުއްވާފައިވާ ބޭފުޅުން ކުރެއްވި ބުރަމަސައްކަތުން ކުރިމަގު ބައްޓަންކުރަންވީގޮތުގެ ފުރިހަމަ ތަޞައްވުރެއް އެކުލަވާލުން ހިމެނެއެވެ. ރާއްޖޭގައި 22 ކުޅިވަރު އެސޯސިއޭޝަން ރަޖިސްޓްރީ ވެފައިވާއިރު، 16 އެސޯސިއޭޝަންއަކުން މި އިޖްލާސްގައި ބައިވެރިވެ ޕްރެސެންޓޭޝަން ހުށަހަޅާފައިވެއެވެ.

މި އިޖްލާސްގައި ސްޕޯޓްސް ކޮމިޝަނަރ އަލްފާޟިލް އަޙްމަދު ނަޝީދުވެސްވަނީ އިޖްލާސްގެ ބައިވެރިންނާއި މުޚާތަބުކޮށް ވާހަކަފުޅުދައްކަވާފައެވެ. ކޮމިޝަނަރ ގެ ވާހަކަ ފުޅުގައި ކުޅިވަރު އިޖްލާސް ބޭއްވުމުގެ މުހިއްމުކަމަށް އަލިއަޅުވާލައި އަދި ކުޅިވަރު ކުރިއެރުވުމަށް އެންމެހާ ބޭފުޅުންގެ އެހީތެރިކަން ބޭނުންވާކަމަށް ވިދާޅުވިއެވެ.

މި އިޖްލާސްގެ ޝަރަފްވެރި މެހެމާން މިނިސްޓަރ އޮފް ޔޫތް އެންޑް ސްޕޯޓްސް އޮނަރަބަލް އިރުތިޝާމް އާދަމް ދެއްކެވި ވާހަކަފުޅުގައި އިޖްލާސް މަޝްވަރާ ބައްދަލުވުމަކީ ކުޅިވަރުގެ ތެރޭގައި ހުރި މައްސަލަތަކާއި ކާމިޔާބީތައް ދެނެގަތުމަށް އެއްފުރާޅެއްގެ ދަށުން ކުޅިވަރުގެ ޤައުމީ އެސޯސިއޭޝަންތަކާއި، ރާއްޖޭގެ ކުޅިވަރުގެ ޚިދުމަތްތެރިންނާއެކު ބޭއްވިގެންދިޔަ މަޝްވަރާ ބައްދަލުވުމެއްކަން ފާހަގަކުރެއްވިއެވެ. އަދުގެ ސަރުކާރުން ރައީސް ޔާމީން ވެރިކަމާއި ޙަވާލުވެ ވަޑައިގެންނެވުމަށްފަހު ކުޅިވަރު ކުޅޭ ފަރާތްކަށާއި، ކުޅިވަރުގެ ދާއިރާގައި ޙަރަކާތްތެރިވާ ފަރާތްތަކަށް ދެމެހެއްޓެނިވި ގޮތެއްގައި ކުރިއަށް ދެވޭނެ ގިނަ މަގުތަކެއް ދަނީ ތަނަވަސް ކޮށްދެއްވަމުންކަން ފާހަގަކުރެއްވިއެވެ. މިގޮތުން ކުޅިވަރު ކުޅުންތެރިންނަށް މުސާރައިގެ ގޮތުގައި، މިއަހަރުގެ މިހާތަނަށްވަނީ، 5.3 މިލިއަން ރުފިޔާ ދެވިފައިވާކަމަށާއި ކުޅިވަރުގެ ޤައުމީ އެސޯސިއޭޝަންތަކަށް މިއަހަރުގެ މިހާތަނަށް ކުއާޓަރ ޕްރޮގްރާމް ބަޖެޓުގެ ގޮތުގައާއި، ބައިނަލްއަޤްވާމީ އަދި ޤައުމީ އެކިއެކި މުބާރާތްތަކުގައި ބައިވެރިވުމަށް 27.3 މިލިއަން ރުފިޔާ ޚަރަދުކުރެވިފައިފައިވާކަމަށް މިނިސްޓަރ ވިދާޅުވިއެވެ. އަދި ކްލަބް ޖަމްއިއްޔާތަކަށް ކުޅިވަރުގެ އެހީ ފޯރުކޮށްދިނުމުގެ ގޮތުން 9 މިލިއަން ރުފިޔާ ޚަރަދުކުރައްވާފައިވާއިރު، ކައުންސިލް އިދާރާތަކަށް ކުޅިވަރުގެ އެކި ބޭނުންތަކަށް 4.7 ލައްކަ ރުފިޔާ މިއަހަރުގެ މިހާތަނަށް ޚަރަދުކުރައްވާފައިވާކަން މިނިސްޓަރ ފާހަގަކުރެއްވިއެވެ. އަދި ކުޅިވަރުގެ ޤާނޫނަށް މިއަހަރުގެ މާރޗް މަހުގެ 7 ވަނަ ދުވަހުން ފެށިގެން ޢަމަލުކުރަން ފަށާފައިވާއިރު ޤާނޫނުގައި ހުރި މުހިއްމު ގިނަ ކަންތައްތަކެއް ދަނީ ތަންފީޒު ކުރެވެމުންކަން ހާމަކުރެއްވިއެވެ.

ހަމައެއާއެކު، ރައީސް ޔާމީންގެ ކުޅިވަރުގެ މެނިފެސްޓޯގެ ދަށުން ދައުލަތުގެ ކުޅިވަރާއި ބެހޭ އެންމެހާ ވަޞީލަތްތައް އެއް މިލްކުވެރިކަމެއްގެ ދަށަށްގެނެވި، ކުޅިވަރު ކުރިއެރުވުމަށްޓަކައި ކުޅިވަރާއިބެހޭ ދައުލަތުގެ ކުންފުންޏެއް ކަމުގައިވާ މޯލްޑިވްސް ސްޕޯޓްސް ކޯޕަރޭޝަން ޤާއިމްކުރެވިފައިވާކަން މިނިސްޓަރ ފާހަގަ ކުރެއްވިއެވެ. އަދި މިކުންފުނީގެ އެހީގައި، ކުޅިވަރުތައް ތަރައްޤީ ކުރުމަށް ބޭނުންވާ މާލީ އެހީތެރިކަން ފޯރުކޮށްދެވި، ރައީސް ޔާމީންގެ ވަޢުދުފުޅާއި އެއްގޮތަށް، ކުޅިވަރުގައި ޙަރަކާތްތެރިވާ ކްލަބް ޖަމްއިއްޔާތައް އަމިއްލަފައި މައްޗަށް ތެދުވުމަށް އެހީތެރިކަމާއި އެއްބާރުލުން ދެވިގެންދާނެކަމަށް އަލިއަޅުވާލެއްވިއެވެ.