މޯލްޑިވްސް ސްޕޯޓްސް ކޯޕަރޭޝަނުން އިންތިޒާމްކޮށްގެން ފިޓްނެސް ލީޑާރސް ތަމްރީނުކުރުމުގެ ޕްރޮގްރާމް މިދިޔަ އާދިއަތް ދުވަހު ވަނީ ފެށިފައެވެ. މިޕްރޮގްރާމް ކުރިއަށް ގެންދިޔުމަށް ހަމަޖެހިފައިވަނީ މި މަހުގެ 16 އިން 20 ވަނަ ދުވަހާ ހަމައަށެވެ. މިޙަރަކާތުގައި 15 ގަޑިއިރުގެ ކިޔެވުމާއި ޢަމަލީ ތަޖުރިބާ ހިމެނޭގޮތަށް ފަރުމާކުރެވިފައިވާ ޕްރޮގްރާމެކެވެ.

މިޕްރޮގްރާމަކީ ކަމާގުޅުން ހުރި ފުރިހަމަ ހުނަރާއި މަޢުލޫމާތު ލިބިފައިވާ ކަމަށް ޤާބިލް ފިޓްނަސް އިންސްޓްރަކްޓަރުން ތަމްރީނުކުރުމާއި މުޖުތަމަޢުގައި ދުޅަހެޔޮ ދިރިއުޅުމެއް އުޅުމަށް ބޭނުންވާނޭ އެކިއެކި ހުނަރުތައް ކުރިއެރުވުމާއި އެފަދަ ހުނަރުތައް ތަރައްޤީކުރުމެވެ.

މި ޕްރޮގްރާމް ހިންގަމުން ދަނީ 20 ބައިވެރިންނާއި އެކުގައެވެ. ތަމްރީންގެ 2 ކްލާސް ކުރިއަށް ގޮސްފައިވާއިރު ބައިވެރިގެންގެ ޝައުގުވެރިކަމާއި ތަރުހީބު ވަރަށް ބޮޑަށް ލިބިފައިވެއެވެ. ޕްރޮގްރާމުގައި މިހާތަނަށް ގެންގޮސްފައިވާ މަޢުލޫތަކާއި ކުރިއަށް ގެންދިއުމަށް ހަމަޖެހިފައިވާ މަޢުލޫތަކުގެ ތެރޭގައި ފިޓްނަސްގެ މަފްހޫމްތަކާއި ބައިތައް، ފިޓްނަސް ޕްރޮގްރާމުތައް ރާވާ، ޑިޒައިންކޮށް ހިންގުން، އަދި އެނަޓޮމީ އަދި ފިޒިއޮލޮޖީ ހިމެނެއެވެ.