ކްލަބް މޯލްޑިވްސް ކަޕްގެ އަންހެން ފިއެސްޓާގެ ޗެމްޕިއަންކަން ޓީމް ފެނަކަ ހޯދައިފިއެވެ. އަދި ފަހަތުން އަރާ އެމް.ޕީ.އެލްގެ މައްޗަށް ކުރި ހޯދާ، ކްލަބް މޯލްޑިވްސް ކަޕް ފުޓްސެލްމުބާރާތުގެ ޗެމްޕިއަންކަން ފުރަތަމަ ފަހަރަށް އެމް.އާރް.ޑީ.ސީން ވަނީ ހޯދާފައެވެ.
އަންހެން ފިއެސްޓާގެ ޗެމްޕިއަންކަން ޓީމް ފެނަކަ ހޯދީ މިއަދު ހަވީރު ކުޅުނު ފައިނަލް މެޗުގައި ދިވެހި ސިފައިންގެ ކްލަބާ ބައްދަލުކޮށް 11-2 ގެ ތަފާތު ބޮޑު ނަތީޖާއަކުން މެޗު ކާމިޔާބުކޮށްގެން ނެވެ.

މިއަދުގެ މެޗުގައި ޓީމް ފެނަކައިގެ ބިދޭސީ ކުޅުންތެރިއެއް ކަމަށްވާ ސަސިޗާ ފޮތިވުންގް ވަނީ 4 ގޯލް ޖަހާފައެވެ. އަދި އެޓީމުގެ ޖެންޖީރާ ބުފާ ހެޓްރިކް ހެދިއިރު، ޖިރަޕްރަޕާ ޓުޕްސުރި ވަނީ 2 ގޯލް ޖަހާފައެވެ. ޓީމް ފެނަކައިގެ އަނެއް ދެ ގޯލް ކާމިޔާބުކޮށްދިނީ އައިޝަތު ސަމާ އާއި ޝަހުލާ ތައުފީގު އެވެ.

ދިވެހި ސިފައިންގެ ކްލަބުގެ ފުރަތަމަ ގޯލް ޕިމްޕިލާ ޗޮކްޗާއި ކާމިޔާބުކޮށްދިންއިރު، އެޓީމުގެ ދެވަނަ ގޯލަކީ ޓީމް ފެނަކައިގެ ޖިރަޕްރަޕާ ޓުޕްސުރި އަތުން ބައިކޮޅަށް ވަން ގޯލެކެވެ.

މޯލްޑިވްސް ރޯޑް ޑިވަލޮޕްމެންޓް ކޯޕަރޭޝަން(އެމް.އާރް.ޑީ.ސީ) ކާމިޔާބުކުރީ މޯލްޑިވްސް ޕޯސްޓް ލިމިޓެޑް (އެމް.ޕީ.އެލް) ކުޅުނު ފައިނަލް މެޗް ނިމިގެން ގޮސްފައިވަނީ އެމް.ޕީ.އެލް ގެ މައްޗަށް ޕެނަލްޓީގައި ކުރި ހޯދައިގެނެވެ.

މެޗުގެ ފުރިހަމަ ވަގުތު ހަމަވި އިރު ދެ ޓީމްވެސް އޮތީ 4-4 ން އެއްވަރުވެފައެވެ.

މިމެޗުގައި ފުރަތަމަ ލަނޑު ޖަހާ ލީޑް ހޯދީ އެމް.ޕީ.އެލް އިންނެވެ. ފުރަތަމަ ހާފްގައި އެމް.ޕީ.އެލްއިން 3-2 ގެ ލީޑެއް ނެގިއެވެ.

މިމެޗުގައި އެމް.ޕީ.އެލް އިން ޖެހި ހަތަރު ލަނޑުގެ ތެރެއިން ފުރަތަމަ ދެ ލަނޑު ކާމިޔާބުކޮށްދިނީ ހުޒޭފަތް ރަޝީދުއެވެ. އަނެއް ދެ ލަނޑު ޖަހައިދީ އަލީ ޝިފާއު (ރޮނާ)އެވެ.

ތިން ލަނޑު ޖަހާފައިވަނިކޮށް އެމް.އާރް.ޑީ.ސީގެ ހަސަން އަދުހަމް ދެވަނަ ހާފްގައި އެޓީމަށް ލަނޑެއް ކާމިޔާބުކޮށްދިނެވެ ނަމަވެސް އެމް.ޕީ.އެލްއިން އިތުރު ލަނޑެއް ޖެހިއެވެ. އެއަށްފަހު އެމް.އާރް.ޑީ.ސީ ކުޅުން ރަނގަޅުކޮށް ގާތް ގާތުގައި ތިން ލަނޑު ޖަހާ މެޗުގެ ނަތީޖާ ހަމަ ހަމަކުރިއެވެ.

ޕެނަލްޓީގައިއެމް.އާރް.ޑީ.ސީ ކުރި ހޯދީ 8-7 ލަނޑުންނެވެ.

ފައިނަލް މެޗުގެ މޮޅު ކުޅުންތެރިއަކަށް ހޮވުނީ އެމް.އާރް.ޑީ.ސީގެ ކެޕްޓަން އިސްމާއިލް އީސާ(މެސީ)އެވެ.

މުބާރާތުގެ އެންމެ ގިނަ ލަނޑު ޖެހި ކުޅުންތެރިއާގެ މަޤާމްގެ އިތުރުން މުޅި މުބާރާތުގެ އެންމެ މޮޅު ކުޅުންތެރިއާގެ މަގާމްވެސް ހޯދީ އެމް.އާރް.ޑީ.ސީގެ މުހައްމަދު ލިޔާޙްއެވެ.

މުބާރާތުގެއެންމެ މޮޅު ފަސް ކުޅުންތެރިންގެ ތެރޭގައި ލިޔާޙުގެ އިތުރުން ހިމެނުނީ އިސްމާއިލްއީސަ (މެސީ) އާއި އެމް.ޕީ.އެލްގެ ހުޒޭފަތް ރަޝީދާއި އަލީ ޝިފާއު (ރޮނާ) އަދިއެމް.އޭ.ސީ.އެލްގެ އަބްދުﷲ ޒިޔާންއެވެ،

މުބާރާތުގެ ފެއަރ ޕްލޭ ޓީމަކަށް ހޮވުނީ މިނިސްޓްރީ އޮފްހައުސިން އަދި ފެއަރ ޕްލޭ ކުޅުންތެރިއާގެ މަޤާމް ހޯދީ ޔުނައިޓެޑް ބީ.އެމް.އެލްގެ ކެޕްޓަން ޝިނާއެވެ.