ކުޅިވަރާއި ކަސްރަތުގައި ޚާއްޞަ އެހީއަށް ބޭނުންވާ ފަރާތްތަކާއި އަދި ކުޅިވަރުގައި ބައިވެރިވުމުގެ ފުރުސަތު ނުލިބޭ ފަރާތްތަކަށް މި ފުރުސަތު ހޯދައިދިނުމުގެ ގޮތުން މޯލްޑިވްސް ސްޕޯޓްސް ކޯޕަރޭޝަން ލިމިޓެޑުން ބޭއްވި، މައިލްސް ފޯ ސްމައިލްސް އިން ލިބުނު ފައިސާގެ ދެބައިކުޅަ އެއްބައި ޚާއްޞަ އެހީއަށް ބޭނުންވާ ކުދިންނާއި މުޖްތަމަޢުގައި ހަވާސާ ކުރެވިފައިވާ ކުދިންނަށް ހޭދަކުރުމަށް މިނިސްޓްރީ އޮފް ޖެންޑަރ އެންޑް ފެމިލީއަށް ވަނީ ހަވާލުކުރެވިފައެވެ. މިފައިސާ (150,000 ރުފިޔާ) އާ ހަވާލުވީ މިއަދު ޖެންޑަރ މިނިސްޓްރީގައި ބޭއްވި ރަސްމިއްޔާތުގައި ޖެންޑަރ މިނިސްޓްރީގެ ޑެޕިއުޓީ މިނިސްޓަރ، އަލްފާޟިލާ ލީޝާ މުހައްމަދެވެ.

މިދުވުމުގައި 2,500 އަށްވުރެ ގިނަ މީހުން ބައިވެރިވެފައިވާއިރު، ދުވުމުގެ ޚާއްސަ މެސެޖު ދިނުމަށް 24 ގަޑިއިރު ދުވީ ލީޑު އެތުލީޓް އިބްރާހިމް ސާއިދު އަލީއެވެ. މި އެތުލީޓަށް ހިތްވަރު ދިނުމުގެ ގޮތުން ސަރުކާރުގެ ގިނަ މުއައްސަސާތަކާއި އަމިއްލަ ފަރާތްތަކެއްގެ އިތުރުން ޖަމިއްޔާ ޖަމާއަތްތަކުގެ މެމްބަރުންވެސްވަނީ ގިނަ ވަގުތުތަކެއްގައި ދުވެފައެވެ. އަދި މިދުވުމުގައި 200 އަށްވުރެ ގިނަ ހާއްސަ އެހީއަށް ބޭނުންވާ ފަރާތްތަކުންވެސް ބައިވެރިވިއެވެ.

މިހަރަކާތުގެ މެއިން ސްފޮންސަރަކީ ރެއިޒް ކްރޯން ޕްރައިވެޓް ލިމިޓެޑެވެ. އަދި މި ދުވުން އެންމެ ފުރިހަމަ ގޮތެއްގައި ކުރިއަށް ގެންދިޔުމަށްޓަކައި އެހީތެރި ވެދެއްވި އެންމެހައި ފަރާތްތަކަށް ޝުކުރު ދަންނަވަމެވެ.