މޯލްޑިވްސް ސްޕޯޓްސް ކޯޕަރޭޝަނުން އިންތިޒާމްކޮށްގެން ޤައުމީ ކުޅިވަރު އެސޯސިއޭޝަންތަކަށާއި، ސްކޫލްތަކުގެ ސްޕޯޓްސް ސުޕަވައިޒަރުންނާއި، ސްކޫލް ކުދިންނަށް އަމާޒުކޮށްގެން ”މެންޓަލް ޓްރެއިނިންގ ފޯރ ސްޕޯޓްސް ޕަރފޯމަންސް“ ގެ ނަމުގައި ލެކްޗަރެއް ބާއްވައިފިއެވެ. މި ލެކްޗަރ ކުރިއަށް ގެންގޮސްފައި ވަނީ ރޭ 8:00 އިން 10:00 އަށް މޯލްޑިވްސް ނެޝަނަލް ޔުނިވަރސިޓީގެ، ސެންޓްރަލް އެޑްމިނިސްޓްރޭޝަން އޮޑިޓޯރިއަމްގައެވެ.

މި ހަރަކާތުގެ މަޤްސަދަކީ ކުޅިވަރުގައި ކާމިޔާބު މީހަކަށް ވުމަށްޓަކައި ނަފްސާނީ ގޮތުން ދިމާވާ ގޮންޖެހުން ތަކުން އަރައިގަތުމެވެ. ލެކްޗަރ ދެއްވީ ސައިކޮލޮޖީ ދާއިރާގައި 40 އަހަރަށްވުރެ ގިނަ އަހަރު ޚިދުމަތް ކުރައްވާފައިވާ އަދި މިހާރުވެސް ޚިދުމަތް ކުރައްވަމުން ގެންދަވާ ޔޫ.ކޭގެ ޕްރޮފެސަރެއް ކަމުގައިވާ ސްރީ ކާންޑިއާއެވެ. ސްރީ ކާންޑިޔާއަކީ ޔޫ.ކޭގެ ސައުތަމްޕްޓަން ޔުނިވަރސިޓީގެ އިތުރުން އެކިއެކި ގައުމުތަކުގައި ސައިކޮލޮޖީ ދާއިރާއިން ވިޒިޓިންގެ ޕްރޮފެސަރެއްގެ ގޮތުގައި މަސައްކަތް ކުރައްވަމުންދާ ބޭފުޅެކެވެ. ރޭގެ ލެކްޗަރގައި އަލިއަޅުވާލެވިފައިވާ މަޢުޟޫޢުއަކީ ”އިންސްޓްލިންގ އަ ޗެންޕިއަންޝިޕް މައިންޑްސެޓް“ އެވެ. ލެކްޗަރ ސެޝަންގައި 200 އެއްހާ ފަރާތުން ވަނީ ބައިވެރިފައެވެ. މިގޮތުން ގިނަ އަދަދެއްގެ ސްކޫލްތަކުގެ ދަރިވަރުންނާއި ސްޕޯޓްސް ސުޕަރވައިޒަރުންނާއި، ކުޅިވަރު އެސޯސިއޭޝަންތަކުގެ އިތުރުން އާންމުންގެ ތަރުހީބު ވަނީ ލިބިފައެވެ.

މި ފުރުސަތުގައި ކާމިޔާބު ޙަރަކާތެއްގެ ގޮތުގައި މި ހަރަކާތް ކުރިއަށް ގެންދިޔުމަށްޓަކައި މޯލްޑިވްސް ސްޕޯޓްސް ކޯޕަރޭޝަނަށް އެހީތެރިކަމާއި އެއްބާރުލުން ފޯރުކޮށްދެއްވި އެންމެހައި އެސޯސިއޭޝަންތަކަށާއި، ސްކޫލްތަކަށާއި، މޯލްޑިވްސް ނެޝަނަލް ޔުނިވަރސިޓީއަށާއި އަމިއްލަ ފަރާތްތަކަށް މި ކުންފުނީގެ ނަމުގައި ނުހަނު އިޚްލާސްތެރި ޝުކުރެއް ރައްދުކުރަމެވެ. މި ކުންފުނީގެ އުއްމީދަކީ ކުރިއަށް އޮތް ދުވަސްތަކުގައި މިފަދަ ކާމިޔާބު އެތައް ޙަރަކާތެއް ކުރިއަށް ގެންދިޔުމެވެ.