އެލައިޑް އިންޝުއަރެންސް ގައުމީ ވޮލީބޯޅަ ލީގުގެ ދެ ވަނަ ބުރުގެ ފުރަތަމަ މެޗުން ސްޓެލްކޯ ރިކްރިއޭޝަން ކްލަބް ބަލިކޮށް ލީގުގެ އެއް ވަނަ އަށް މޯލްޑިވިއަން އަރައިިފި އެވެ.

ކޮންމެ ޓީމެއް ލީގުގައި ޖުމްލަ ހަ މެޗު އަދި ފުރަތަމަ ބުރުގައި އެއް މެޗު ކުޅެފައިވާ އިރު މޯލްޑިވިއަން އެއް ވަނައިގައި އޮތީ 16 ޕޮއިންޓާ އެކު އެވެ. ދެ ވަނައިގައި 15 ޕޮއިންޓާ އެކު އޮތީ ދިވެހި ސިފައިންގެ ކްލަބެވެ. ނުވަ ޕޮއިންޓާ އެކު ތިން ވަނައިގައި ސްޓެލްކޯ އޮތްްއިރު ޕޮލިސް ކްލަބް އޮތީ އަށް ޕޮއިންޓާ އެކު ހަތަރު ވަނައިގަ އެވެ. ފަސް ވަނައިގައި ހަ ޕޮއިންޓާ އެކު ސްޕޯޓްސް ކްލަބް ސިޓީ އޮތްއިރު ފުލުގައި އޮތް ގުޑީސް ސްޕޯޓްސް ކްލަބަށް ޕޮއިންޓެއް ނުލިބެ އެވެ. މޯލްޑިވިއަން އާއި ސިފައިންގެ ފޯމް މިގޮތުގައި ދެމިއޮވެއްޖެ ނަމަ ލީގު ކަށަވަރުވާނީ ހުކުރު ދުވަހުގެރޭ އެ ދެ ޓީމު ކުޅޭ ލީގުގެ ފަހު މެޗުންނެވެ.

ރޭ ސްޓެލްކޯ އަތުން މޯލްޑިވިއަން މޮޅުވީ ސީދާ ތިން ސެޓުންނެވެ. މި މެޗުގެ ސެޓުތައް މޯލްޑިވިއަން ކާމިޔާބުކުރީ 25-21، 25-14 އަދި 25-22 އިންނެެެވެ. މޮޅު ކުޅުންތެރިޔާގެ މަގާމް ހޯދީ މޯލްޑިވިއަންގެ ވިނީތު ކުމާރެވެ.

ރޭ ސިފައިން ވަނީ ވާދަވެރި ޕޮލިސް ކްލަބް އަތުން ސީދާ ތިން ސެޓުން މޮޅުވެފަ އެވެ. ވާދަވެރިކޮށް ދިޔަ މި މެޗުގެ ސެޓުތައް ސިފައިން ގެންދިޔައީ 25-21، 26-24 އަދި 25-19 އިންނެވެ. މި މެޗުގައި އެންމެ މޮޅު ކުޅުމެއް ދެއްކީ ސިފައިންގެ ކްލަބުގެ އާދަމް ނަސީމެވެ.

ފުލުގައި އޮތް ދެ ޓީމު ކަމަށްވާ ސިޓީ އާއި ގުޑީސް ރޭ ކުޅުނު މެޗު ސީދާ ތިން ސެޓުން ކާމިޔާބުކުރީ ސިޓީ އެވެ. މި މެޗުގެ ސެޓުތައް ސިޓީން ކާމިޔާބުކުރީ 25-20، 25-20 އަދި 25-22 އިންނެވެ. މެޗުގެ މޮޅު ކުޅުންތެރިޔާގެ މަގާމް ހޯދާފައިވަނީ ސިޓީގެ ހުސެއިން ރަޒާން އެވެ.

ލީގު އުސޫލުން ދެ ބުރު ކުޅުމަށް ފަހު އެންމެ ގިނަ ޕޮއިންޓް ހޯދާ ޓީމަކަށް ޗެމްޕިއަންކަން ލިބޭއިރު ގައުމީ މުބާރާތަށް ހޮވޭނީ ގަދަ ހަތަރު ޓީމެވެ.