މޯލްޑިވްސް ސްޕޯޓްސް ކޯޕަރޭޝަންގެ ވެބްސައިޓް މިއަދު ރަސްމީކޮށް އިފްތިތާހްކޮށްފިއެވެ. ވެބްސައިޓް އިފްތިތާހްކޮށްދެއްވާފައިވަނީ، މިއަދު  ބެއްވުނު ރަސްމިއްޔާތުގެ ޝަރަފަވެރި މެހެމާނު ރައްޔިތުންގެ މަޖިލީހުގެ މާލެ ދެކުނު ދާއިރާގެ މެމްބަރު ޢަބްދުﷲ ރިފާޢު، މިކަމަށް ހާއްސަކޮށް ގަލޮޅު ބޯޅަ ދަނޑުގައި ބޭއްވުނު ރަސްމިއްޔާތުގައެވެ.

ސްޕޯޓްސް ކޯޕަރޭޝަންގެ ވެބްސައިޓް ލޯންޗްކުރުމުގެ މަޤްޞަދަކީ ވެބްސައިޓް މެދުވެރިކޮށް ސްޕޯޓްސް ކޯޕަރޭޝަންއިން ހިންގާ އެންމެހައި ކަންތައްތަކާއި އަދި ކުރިއަށް ރޭވިފައިވާ ކަންތައްތައް، އެންމެހައި ފަރާތްތަކަށް ފަސޭހަކަމާއެކު ފޯރުކޮށްދެވޭނެ ޕްލެޓްފޯމެއް ޤާއިމްކުރުމެވެ. މި ވެބްސައިޓް މެދުވަރިކޮށް މިކުންފުނިން ހިންގާ އިވެންޓްތަކާއި، ނޫސް ބަޔާން، އިޢުލާން، ކުޅިވަރު ޚަބަރުތައް، ސަރވިސަސް އެންޑް ފެސިލިޓީސް، އަދި މި ކުންފުނީގެ ފަރާތުން ހުޅުވާލައި ވަޒީފާގެ ފުރުސަތުތަކާއި ބެހޭ މައުލޫމާތު ލިބިގެންދާނެއެވެ.

ވެބްސައިޓް ލޯންޗިންގއަށްފަހު، މި ވެބްސައިޓް އާއި ގުޅޭ ވީޑިއޯ ކްލިޕެއް ވަނީ ދައްކާލާފައެވެ.

މިރަސްމިއްޔާތުގައި މޯލްޑިވްސް ސްޕޯޓްސް ކޯޕަރޭޝަނުން ޝާއިއުކުރުމަށް ނިންމާފައިވާ ކުޅިވަރު މަޖައްލާގެ ބްރޭންޑިންގ ”ކުޅިވަރު“ ނިއުސް ބްރޭކްކޮށްފައިވެއެވެ. މިނަންބަރު ފުރިހަމަ ކޮށް ދެއްވާފައިވަނީ ސްޕޯޓްސް ކޯޕަރޭޝަންގެ ބޯޑް ޑިރެކްޓަރ އަލްފާޟިލް މުޙައްމަދް ފިޝާވިން ސަލީމްއެވެ. މަޖައްލާ ނެރުމަށް ހަމަޖެހިފައިވާނީ އަހަރަކު 2 އެޑިޝަންއެވެ.

މި ލިންކް ( http://www.sportsco.mv/dv/ ) މެދުވެރިކޮށް ސްޕޯޓްސް ކޯޕަރޭޝަންގެ ވެބްސައިޓަށް އެކްސެސްވެވޭނެއެވެ.