ޕްރެޒިޑެންޓްސް ކަޕުގައި ވާދަކުރާ ސ. ފޭދޫ ޓީމުގެ ކުޅުންތެރިން ތިބީ ގަލޮޅު ދަނޑުގައި ފެންވަރު ސާބިތުކޮށްދޭން ކެތްމަދުވެފައި ކަމަށާއި މުބާރާތުގައި ރަނގަޅު ފައިޓެއް ދޭނެ ކަމަށް އެ ޓީމުގެ މެނޭޖަރު އަބްދުﷲ ނަސީރު ބުނެފި އެވެ.

މިދިޔަ އަހަރުގެ މިނިވަން 50 ޗެމްޕިއަންޝިޕުގެ ޗެމްޕިއަން ޓީމުގެ ހައިސިއްޔަތުން ގައުމީ މުބާރާތުގައި ފޭދޫ ވާދަކުރާއިރު އެ ޓީމު ހިމެނެނީ އުރީދޫ ދިވެހި ޕްރިމިއާ ލީގުގެ ޗެމްޕިއަން މާޒިޔާ އާއި ޔުނައިޓެޑް ވިކްޓަރީއާ އެކު ގްރޫޕް ބީ ގަ އެވެ. އޭ ގައި ހިމެނެނީ ނިއު ރޭޑިއަންޓާއި ކްލަބް އީގަލްސް އަދި ޓީސީ ސްޕޯޓްސް ކްލަބެވެ.

ފުރަތަމަ ޑިވިޝަނަށް ފޭދޫ ޓީމު މުޅިން އާ ނަމަވެސް އެ ޓީމުގައި ފުރަތަމަ ޑިވިޝަނުގައި ކުރިން ކުޅެފައިވާ ގިނަ ކުޅުންތެރިން ހިމެނެ އެވެ. އޭގެ ތެރޭގައި ގައުމީ ޓީމާއި ނިއު އަދި ވިކްޓަރީގެ ކުރީގެ ޑިފެންޑަރު އަހުމަދު ސައީދު (އައްމަޓީ) އާއި ކުރިން އައިއެފްސީ އާއި ވެލެންސިއާ އަށް ކުޅުނު އަހުމަދު ޝާފިއު (ޝާޓީ) އާއި އަލީ ޝަރީރު (ޕީޓާ) އަދި މާޒިޔާގެ ކުރީގެ ޑިފެންޑަރު ހުސެއިން ލަތީފް (ކާލޯސް) ހިމެނެ އެވެ.

”އަޅުގަނޑުމެންގެ އެބަތިބި ފުރަތަމަ ޑިވިޝަނުގެ ތަޖުރިބާ ހުރި ގިނަ ކުޅުންތެރިން. މުޅި ޑިފެންސް ލައިނަކީ ކުރިން ގަލޮޅު ދަނޑުގައި މަތީ ފެންވަރުގައި ކުޅެފައި ތިބި ކުޅުންތެރިން،“ ނަސީރު ބުންޏެވެ. ”އެކަމަކު މައްސަލައަކީ މިދިޔަ އަހަރުގެ މިނިވަން 50 މުބާރާތުގައި ކުޅުނު ގާނާ ފޯވާޑަށް ކުޅެވޭ ގޮތް ނުވުން. މި އަހަރުގެ މުބާރާތުގައި ކުޅުނު ޓީމް ލިސްޓަށް ބަދަލެއް ގެނެވޭ ގޮތެއް ނުވި.“

ނަސީރު ބުނީ މި ދެ އަހަރު ޓީމަށް ކުޅުނު ދިވެހި ކުޅުންތެރިން ފެންނާނެ ކަމަށާއި އޭގެ ތެރޭގައި މިދިޔަ އަހަރުގެ މުބާރާތުގެ ފައިނަލުގައި އާދަޔާހިލާފު މޮޅު ލަނޑެއް ކާމިޔާބުކުރި އިބްރާހިމް މަހުދީ (ކުދު އިއްބެ) ހިމެނެ އެވެ. އޭނާ ބުނީ ގިނަ ކުޅުންތެރިން ތިބީ ގަލޮޅު ދަނޑުގައި ފެންވަރު ދައްކާލަން ކެތްމަތުވެފައި ކަމަށެވެ.

”މިނިވަން ޗެމްޕިއަންޝިޕަށް ފަހު ބައެއް ކުޅުންތެރިން ރިޒޯޓުން ޗުއްޓީ ހަމަވެފައިވަނީ. އެކަމަކު ސީދާ ގައުމީ މުބާރާތުގައި ކުޅެން ނޯޕޭ ލީވް ނަގައިގެން ބައެއް ކުޅުންތެރިން ވަނީ ޓީމާ ގުޅިފައި،“ ނަސީރު ބުންޏެވެ. ”ހާއްސަކޮށް އިއްބެ ވެސް ހުރީ ވަރަށް ކުޅޭހިތުން. އޭނާ ހުރީ ވެސް ރަނގަޅު ފޯމެއްގައި.“

ފޭދޫ ޓީމެއް އެންމެ ފަހުން ގައުމީ މުބާރާތުގައި ވާދަކޮށްފައިވަނީ 1970ގެ ތެރޭގަ އެވެ. އެ ފަހަރު މަޝްހޫރު ޑީއެންސީ ވަނީ 1970 އާއި 1972 ވަނަ އަހަރުގެ މުބާރާތުގެ ޖޮއިން ޗެމްޕިއަންކަން ހޯދައިފަ އެވެ. ފޭދޫ ޓީމުން އޭރު ވިދާލި ކުޅުންތެރިންގެ ތެރޭގައި އުދުހޭ މުފީދު ހިމެނެ އެވެ.

”މި ފަހަރު އަނެއްކާ ގައުމީ މުބާރާތުން ފުރުސަތު ލިބުމަކީ ޒުވާން ކުޅުންތެރިންނަށް ލިބޭ ވަރަށް ރަނގަޅު ފުރުސަތެއް. ބޮޑެތި ޓީމުތަކާ ދެކޮޅަށް ކުޅެ ފެންވަރު ދައްކާލަން މިއީ ލިބޭ ރަނުގެ ފުރުސަތެއް،“ ނަސީރު ބުންޏެވެ.

އޭނާ ބުނީ ފޭދޫ ޓީމަކީ މުބާރާތުގައި ވާދަކުރާ އެންމެ ދަށް ޓީމުގެ ގޮތުގައި ބައެއް ޓީމުތަކުން ދެކޭ ކަމަށާއި ބޭނުންވަނީ ވަރުގަދަ ފައިޓެއް ދޭން ކަމަށެވެ.

”ފުރަތަމަ މެޗު ވެސް މިރޭ އޮތީ ގައުމީ ޓީމާ ދެކޮޅަށް. މާޒިޔާގައި ގައުމީ ޓީމުގެ ގިނަ ކުޅުންތެރިން އެބަތިބި. ރަނގަޅު ފައިޓެއް ދޭނަން އިރާދަކުރެއްވިއްޔާ. މުބާރާތުގައި ރަނގަޅު ހިސާބަކަށް ދެވޭނެ ކަމަށް އުއްމީދުކުރަން،“ ނަސީރު ބުންޏެވެ.