ކުޅިވަރުގެ ގިނަ ވަސީލަތްތަކެއް ހިމެނޭ ގޮތަށް ބައިނަލްއަގްވާމީ ފެންވަރަށް ހުޅުމާލޭ ދެ ވަނަ ފިޔަވަހީގައި ސަރުކާރުން ގާއިމްކުރާ 40 މިލިއަން ޑޮލަރުގެ ސްޕޯޓްސް ކޮމްޕްލެކްސްގެ ބިޔަ މަޝްރޫއު މިއަދު ރަސްމީކޮށް އިފްތިތާހުކޮށްފި އެވެ.

ކޮންޓްރެކްޓާ ފައިނޭންސް އުސޫލުން ކުރިއަށްގެންދާ މި ޕްރޮޖެކްޓުގެ ފްރޭމްވޯކް އެއްބަސްވުމުގައި މިއަދު ވަނީ ބައިނަލްއަގްވާމީ ކުންފުންޏެއް ކަމަށްވާ އޭޖީޓީ މެނޭޖްމަންޓް ކޮންސަލްޓިން އެންޑް ކޮންސްޓްރަކްޝަން ސާވިސަސް ލިމިޓެޑާ އެކު ސޮއިކޮށްފަ އެވެ.

ހޮޓެލް ޖެންގައި މިއަދު ހެނދުނު ބޭއްވި ރަސްމިއްޔާތެއްގައި އެއްބަސްވުމުގައި ސޮއިކުރީ ކުޅިވަރާ ބެހޭ ވަޒީރު އިރުތިޝާމް އާދަމާއި މާލީ ވަޒީރު އަހުމަދު މުނައްވަރާއި ހައުސިން ޑިވެލޮޕްމަންޓް ކޯޕަރޭޝަން ލިމިޓެޑުގެ މެނޭޖިން ޑިރެކްޓަރު މުހައްމަދު ސައިމަން އަދި އޭޓީޖީގެ ޑިރެކްޓަރު މުރަތު ޓުރްކޮގްލޫ އެވެ.

މި ކޮމްޕްލެކްސްގެ މަސައްކަތް 2018 ވަނަ އަހަރު ނިމުމުގެ ކުރިން ނިންމަން އަމާޒުކޮށްފައިވާއިރު އޭޓީޖީ އިން ބުނީ ވަރަށް އަވަހަށް ފައިނަލް އެއްބަސްވުމުގައި ސޮއިކުރެވި އިމާރާތްކުރުމުގެ މަސައްކަތް ފެށޭނެ ކަމުގެ ޔަގީންކަން އެބައޮތް ކަމަށެވެ.

ކުޅިވަރާ ބެހޭ ވަޒީރު އިރުތިޝާމް ވިދާޅުވީ މިއީ ރައީސް އަބްދުﷲ ޔާމީން ޒުވާނުންނަށް ދެއްވާ ހާއްސަ އަހަމިއްޔަތުގެ ތެރެއިން ދައުލަތުގެ ބަޖެޓުން ބޮޑު ހޭދައެއް ކުރައްވައިގެން ހިންގާ މަޝްރޫއެއް ކަމަށެވެ. އަދި މި ކޮމްޕެލްކްސްގެ ސަބަބުން ޒުވާން އެތުލީޓުންނާއި ކުޅިވަރު އެސޯސިއޭޝަންތަކަށް ދިމާވެފައިވާ ވަސީލަތްތަކުގެ ދަތިކަމަށް ހައްލެއް ލިބިގެންދާނެ ކަމަށް ވިދާޅުވި އެވެ.

”ނޭޝަނަލް ސްޕޯޓްސް ކޮމްޕްލެކްސް އަކީ އެއް ފުރާޅެއްގެ ދަށުން ގިނަ ކުޅިވަރު ކުޅެވޭނެ ވަސީލަތްތައް ގާއިމް ކުރެވިގެންދާނެ ތަނެއް. މީގެ އިތުުރުން މަލްޓި-ޕާޕަސް އިންޓަނޭޝަނަލް ވެނިއުއެއް މި ކޮމްޕްލެކްސްގައި ގާއިމް ކުރެވިގެންދާނެ،“ މިނިސްޓަރު ވިދާޅުވި އެވެ.
ކުޅިވަރާ ބެހޭ ވަޒީރު އިރުތިޝާމް މިއަދުގެ ރަސްމިއްޔާތުގައި ވާހަކަފުޅުދައްކަވަނީ. –ފޮޓޯ: ނިޝާން އަލީ/ މިހާރު

މި ކޮމްޕްލެކްސްގައި ގާއިމްކުރާ ބައިނަލްއަގްވާމީ އިންޑޯ ސްޕޯޓްސް ސްޓޭޑިއަމުގައި ބެޑްމިންޓަނާއި ބާސްކެޓްބޯޅަ އާއި ނެޓްބޯޅަ އާއި ވޮލީބޯޅަ އާއި ހޭންޑްބޯޅަ އާއި ފުޓްސަލް އަދި ޓޭބަލް ޓެނިސް ކުޅެވޭނެ އެވެ.

މީގެ އިތުރުން ބެޑްމިންޓަން ހަ ކޯޓާއި ބާސްކެޓްބޯޅަ ކޯޓަކާއި ނެޓްބޯޅަ ކޯޓަކާއި ދެ ވޮލީބޯޅަ ކޯޓާއި ހޭންޑްބޯޅަ ކޯޓަކާއި ދެ ފުޓްސަލް ކޯޓުގެ އިތުރުން ޓޭބަލް ޓެނިސް ކޯޓަކާއި ބޯލިން އެރީނާއެއް އަދި ބިލިއާޑް ހޯލެއް ހެދުމަށް ވަނީ ނިންމައިފަ އެވެ.

ކުޅިވަރު ކުޅޭނެ ވަސީލަތްތަކުގެ އިތުރުން ހެލްތު ސްޕާއަކާއި ސްޕޯޓްސް ކްލިނިކެއްގެ އިތުރުން ހޮޓަލަކާއި އެޕާޓްމަންޓްތަކެއް ވެސް މި ކޮމްޕްލެކްސްގައި ގާއިމްކުރާނެ އެވެ.

”ކުޅިވަރު ކުޅުންތެރިންގެ (އެކޮމަޑޭޝަން) ވަސީލަތް ވެސް މިތަނުގައި ހިމެނޭނެ. އަދި ސަސްޓެއިނަބަލް ގޮތަކަށް މިތަނުގެ ހިދުމަތް ދިނުމުގެ ގޮތުން ފައިސާގެ ރިޓާން ހޯދުމަށްޓަކާއި ހޮޓަލެއް ވެސް ގާއިމްކުރެވިގެންދާނެ،“ މިނިސްޓަރު ވިދާޅުވި އެވެ.

ހައުސިން ޑިވެލޮޕްމަންޓް ކޯޕަރޭޝަން ލިމިޓެޑުގެ މެނޭޖިން ޑިރެކްޓަރު ސައިމަން ވިދާޅުވީ ރައީސް ޔާމީންގެ ވައުދާ އެއްގޮތަށް ހުޅުމާލޭގެ ދެ ވަނަ ފިޔަވަހި ތަރައްގީ ކުރަނީ ޔޫތު ސިޓީއެއްގެ ގޮތުގައި ކަމަށާއި އެގޮތުން އެ ސިޓީގެ އެންމެ މުހިއްމު އެއް ކޮމްޕޯނަންޓަކީ ކުޅިވަރާއި ރިކްރިއޭޝަން ވަސީލަތްތައް ކަމަށެވެ.

”އަޅުގަނޑުމެން ބޭނުންވަނީ އެއް ދިމާލެއްގައި ކުޅިވަރުގެ ހުރިހާ ކަމެއް ތަރައްގީކުރަން. އެގޮތުން ސްޕޯޓްސް ޑިސްޓްރިކްޓެއް މި ތަރައްގީކުރަނީ. އުއްމީދުކުރަނީ 2018 ވަނަ އަހަރު ނިމުމުގެ ކުރިން މަސައްކަތް ނިންމާލުން،“ ސައިމަން ވިދާޅުވި އެވެ.