މޯލްޑިވްސް ސްޕޯޓްސް ކޯޕަރޭޝަނާ ދިވެހި ރެޑް ކުރެސެންޓް ގުޅިގެން ’ޕްރެކްޓިކަލް ފަސްޓް އެއިޑް ފޯ މެޑިކަލް އޮފިސަރސް‘ ގެ ނަމުގައި ޓްރެއިންނިން ޕްރޮގްރާމެއް ފަށައިފިއެވެ. މިމަހުގެ 22-23 އަށް ކުރިއަށް ގެންދިއުމަށް ހަމަޖެހިފައިވާ މި ޕްރޮގްރާމަކީ ރާއްޖޭގެ ކުޅިވަރު އެސޯސިއޭޝަންތަކާ ކުލަބުތަކަށް އަމާޒުކޮށްގެން މޯލްޑިވްސް ސްޕޯޓްސް ކޯޕަރޭޝަނުން 2017 ކުރިއަށް ގެންދިއުމަށް ރާވާފައިވާ ފަސްޓް އެއިޑް ޕްރޮގްރާމްގެ ފުރަތަމަ ބުރެވެ.

މި ޓްރެއިނިންގ ޕްރޮގްރާމްގެ މަޤްސަދަކީ އެކި ކުޅިވަރުތަކުގައި ވާދަކުރާ ޓީމްތަކުގެ ފަސްޓް އެއިޑް އޮފިޝަލުން ތަމްރީނުކުރުމެވެ. މި ޕްރޮގްރާމުގައި އެސޯސިއޭޝަންތަކާ ކުލަބުތަކުގެ މެޑިކަލް އޮފިސަރުންނަށް ފަސްޓް އެއިޑާބެހޭ މަޢުލޫމާތު ޙިއްސާކުރެވި، ޢަމަލީ ތަޖުރިބާގެ ބައެއްކަންކަން ވެސް ކުރިއަށް ގެންދެވޭނެއެވެ. މި ޕްރޮގްރާމުގައި ކިޔަވައިދެއްވަނީ މޯލްޑިވްސް ރެޑް ކްރެސެންޓުގެ މެޑިކަލް ލެކްޗަރާއިންނެވެ.

މި ފަސްޓް އެއިޑް ޓްރެއިނިންގ ކޯހުގައި ކުޅިވަރު އެސޯއިއޭޝަންތަކާއި ކުލަބުތަކުން ބައިވެރިވެފައިވެއެވެ. އޭގެ ތެރޭގައި ކްރިކެޓް ބޯޑް އޮފް މޯލްޑިވްސް، ހޭންޑް ބޯލް މޯލްޑިވްސް، ސުވިމިން އެސޯސިއޭޝަން އޮފް މޯލްޑިވްސް، ނެޓްބޯލް އެސޯސިއޭޝަން އޮފް މޯލްޑިވްސް، ނިއު ލެގޫން ސުވިމިން ކުލަބް، ކުލަބް އީގަލްސް، ވޮލީބޯލް އެސޯސިއޭޝަން އޮފް މޯލްޑިވްސް، ނިއު ރޭޑިއެންޓް ސްޕޯޓްސް ކުލަބް، ޓެނިސް އެސޯސިއޭޝަން އޮފް މޯލްޑިވްސް، އެތުލެޓިކްސް އެސޯސިއޭޝަން އޮފް މޯލްޑިވްސް އަދި ބެޑްމިންޓަން އެސޯސިއޭޝަން އޮފް މޯލްޑިވްސް ހިމެނެއެވެ.

މި ޕްރޮގްރާމް ޝަރަފްވެރިކޮށްދެއްވީ މޯލްޑިވްސް ސްޕޯޓްސް ކޯޕަރޭޝަންގެ މެނޭޖިންގ ޑިރެކްޓަރ އަލްފާޞިލް ޢަބްދުރައްޒާޤް އިބްރާހިމެވެ. މި ޕްރޮގްރާމް ފައްޓަވައިދެއްވުމުގެ ގޮތުން ޢަބްދުރައްޒާޤު ދެއްކެވި ވާހަކަފުޅުގައި، ކުޅިވަރުގެ މެޑިކަލް އޮފިސަރުންނަސް އެކަށޭނަ ތަމްރީން ލިބުމުގެ މުހިންމު ކަމުގެ މައްޗަށާއި، ރާއްޖޭގައި ކުޅިވަރުގެ ފަސްޓް އެއިޑް ފޯރުކޮށްދޭ ފަރާތްތަކަށް އިތުރު ތަމްރީނާއި މަޢުލޫމާތު ލިބޭނެ އިންތިޒާމް ހަމަޖައްސައިދިނުމަށް ކުރިއަށް އޮތްތަނުގައިވެސް މަސައްކަތްކުރައްވާނެ ކަމަށް ވިދާޅުވިއެވެ.